Mat 20 | KYG | STEP | Yesu'a, Goti'mo yagaino ne'apateya kava'mo hane'niya kava huno mago nofi hoyamo aepa vekamo'a kotilamiyapi'mo uno vaya'mo apavalelineno ali'ya'ale'mo apatesige'a ali'ya'amo alisayafe'mo u'niye.

Matthew 20

Nofi hoyafi'mo ali'ya'mo ne'aliya vaya'aife'mo aeno kalafefa gemo hu'niya gemae

1 Yesu'a, Goti'mo yagaino ne'apateya kava'mo hane'niya kava huno mago nofi hoyamo aepa vekamo'a kotilamiyapi'mo uno vaya'mo apavalelineno ali'ya'ale'mo apatesige'a ali'ya'amo alisayafe'mo u'niye. 2 Apakaemo, ali'yakamo aliteta magoke afina'mo ne'aliya agufa monimo aligune, hu'a ha pai'nageno, he kanalene, huno huteno alino apate'nige'a nofi hoya'alegamo u'nae. 3 Halate yegemo leno hakale hu'niya kanale'mo uno apakeyana taoni folagapi'mo ali'a anupa hu'a ne'maiyategamo mago vaya'mo afa'a he ti'a mai'nageno apaketeno'ae'mo, 4 lapakae'e'mo nofi hoya'nifi'mo utapa magokepi ali'ya'mo aliyo, kanale miya'mo lapamiguvanagi, huno hapa pai'nige'a u'nae. 5 Ani kava huno felugakuku'mo ani agufa kava huge une'mo ani agufa kava huge hu'niye. 6 Yegemo lamino falegefe'mo hu'niya kanale'mo uno apakeyana taoni folagapi'mo ali'a anupa hu'a ne'maiya yate'mo mago vaya'mo afa'a he ti'a mai'nageno apaketeno'ae'mo, na kava higetapae'mo muki afina'mo afa'a ne'maiye, huno apafi ge'nige'apae'mo, 7 mago vekamo'a ali'ya'amo alisunafe'mo olavale'nigeta afa'a mai'none, hu'a hu'nageno'ae'mo, lapakae'e'mo utapa nofi hoya'nifi'mo ali'ya'mo aliyo, huno hapa pai'niye. 8 Yegemo lamino falegefe'mo hu'nigeno'ae'mo nofi hoya aepa ne'mo'a kava ne'ae'mo, ali'ya'nimo ne'aliya vaya'aife'mo ge huge'apao esageka henaga u'a ali'ya'nimo ali'naya vaya'mo miya'apimo apamiteka hogote'a u'a ali'ya'mo ali'naya vaya'mo miya'apimo apamiyo, huno ha pai'niye. 9 Yegemo lamino falegefe'mo hu'nigeno uno apavalelineno ali'ya'amo ali'naya yatefe'mo apamete apamete huno magoke monimo apamite apamite huno apami'niye. 10 Hogote'a u'a ali'ya'mo ali'naya vaya'mo e'apae'mo mago'e hutage'mo monimo aligune, hu'a apakesa afi'naya'monanafa magoke agufa monimo apami'niye. 11 Moni'apimo alite'apae'mo nofi hoya aepa vekae'mo hagalu hagalu hu'a ge hau'apae'mo, 12 ani henaga u'naya vaya'mogimo magoke afina'mo ali'ya'mo ali'nageta lagaemo muki afina'mo yegemo nelalegeta ali'ya'mo ali'nona'monanafa magoke agufa miya'mo lami'nane, hu'a hu'nae. 13 Hu'a hu'nageno'ae'mo mago vekae'mo, ve'nimo, huno, miyatapifati'mo nagaemo kumaya o'ali'nove. Magoke afina'mo ne'aliya agufa monimo aligune, hutapa hu'naya'mofe'mo 14 miyakamo aliteka nokalegamo uvo. Henaga e'naya vaya'e'mo magoke agufa miya'mo apamisuvafe'mo nahau'niye. 15 Nagai'ni ya'moge'na apamisuva himamu'nimo ohane'nifiye. Vaya nekauva vekamo mai'nova'mofe'mo kaha'ye nehifiye, huno ha pai'niye. 16 Ani kava hu'a henaga ne'maiya vaya'mo hogote vaya'mo maigae. Hogote'a ne'maiya vaya'mo henaga vaya'mo maigae. Goti'a asole vaya'aife'mo eyo huno ge hu'niya'monanafa aise vaya'mo lekana paino apate'niye, huno hapa pai'niye.

Yesu'a halate, falite'na he tiguve, huno hapa pai'niya gemae

(Mak 10:32-34; Luk 18:31-33)

17 Yesu'e ge'amo ne'afiya vaya'e'mo Yulusalemu taonifi'mo magokepi lokaeli'u'a nehai'apae'mo Yesu'mo tuolofu'a vaya'mo apaote apavalelino ne'uno'ae'mo, 18 Yulusalemu taonifi'mo haigune. Ani taonifi'mo kutulu ya'mo alisiya vekamo'a Vemo mafa'nemo avalelino mono hu'a ne'apataya vaya'aite'mo yagai'a ne'apataya vaya'e ke'aepa gemo avo'mo kae'a ali'a apaya ne'malaya vaya'e'mo apayapi'mo ategaiye. Apakaemo agoti hu'a atete'apae'mo faligiye, hu'a hute'a 19 alu nofi vaya'ai apayapi'mo avale'a atesage'a kigi hu'a atete'a nofi kayoteti'mo amagite'a malipu yosale'mo nili aigae. Lole'e mago'e afina'mo maitesigeno halate alino he tino ategaiye, huno hapa pai'niye.

Yemisi'e Yoni'e'mo ala netala'mo maigu'ae, hu'ana hu'na'a gemae

(Mak 10:35-45)

20 Sepeti mafa'nela'mo ita'animo'e'mo Yesutega e'apae'mo ita'animo'mo eno ale'ya fai'neno'ae'mo kahao ke hove, huno hu'nigeno 21 Yesu'a, na agufa yafe'mo kahau'niye, huno afi ge'nigeno ita'animo'mo huno'ae'mo, ala'apimo mai'neka yagaika apatesanage'anae'mo kagae'e'mo lokae'ana mai'ne'anae'mo mago mafa'ne'nimo'a lamaga kahaopale'mo fai maisigeno mago mafa'ne'nimo'a hoga kahaopale'mo fai maisigeno hisa'afe'mo nahau'niyanagi he kanalene, hu'na anategauve, huka naha paiyo, huno afi ge'niye. 22 Yesu'a, na agufa yafe'mo ge huta afi nekopi hutapa o'afi'nae. Aise afina'mo utesige'na kapufi ani'mo nesuva agufa kava hutana ani kapufi ani'mo afa'a nega'afiye, huno anafi ge'nige'anae'mo, afa'a negau'ae, hu'ana ha pai'na'ae. 23 Ha pai'na'ageno'ae'mo, he, alagi lama ge neha'ae. Nagaemo nesuva kapufati'mo afa'a nega'a'monanafa lamaga nahaopale'mo maige hoga nahaopale'mo maige hutana maisa'afe'mo nagae ya'mo ohane'niye. Afa'a ge osuguva'monanafa afo'nimo'mo maisa'afe'mo alo huno lanate'niye, huno hana pai'niye.

24 Teni'a vaya'mo ge'amo ne'afiya vaya'mogimo ani gemo afite'apae'mo lole konagala'anife'mo apaipamo le'a anate'na'ae. 25 Yesu'a muki'ae'mo ge hu'nige'a e'nageno'ae'mo, lapakaemo ago afi'nayana alu nofi vaya'aite'mo yagai'a ne'apataya vaya'mogimo lusi kava hu'a kava yagai'a ne'apatae. Ani kava hu'a ala vaya'apimogi himamu'apileti'mo yagai'a ne'apatae. 26 Lapakae folagapati'mo mani agufa kava'mo afa'a osisaya kava'mo hane'niye. Lapakaepati'mo mago vekamo'a alatapimo maigesuve, huno hu'nisiya'mo'mo ali'ya'mo alisiya vekatapimo maino. 27 Mago vekamo'a, hogote vekamo maigesuve, huno nehisiya'mo'mo ali'yatapile'mo maino. 28 Vemo mafa'nemo ani kava huno ha mae'a yagai'a atesayafe'mo emi'no'me'nifa hapa maeno yagaino apateteno muki asole vaya'aitefe'mo falino miya faino hatu maeno apatesiyafe'mo emine'niye, huno hapa pai'niye.

Yesu'a anaulagamo ali hu'niya vekala'mo alino ayakeno anate'niya gemae

(Mak 10:46-52; Luk 18:35-43)

29 Yeliko taonifati'mo atale'a u'nage'apae'mo asole vaya'mo e'a Yesu'mo akame hu'a u'nae. 30 Anaulagamo ali hu'niya vekala'mo ka agi'nale'mo itopale'mo mai'na'age'apae'mo, Yesu'mo ne'e, hu'a hu'naya gemo afite'anae'mo, Ala kava nene, Nevini aginagomo kahau huka la'ato, hu'ana alopa gefati'mo ge hu'na'ae. 31 Asole vaya'mogi ke hanaute'anae'mo, ge osutana afa'a mai'ao, hu'a hana pai'naya'monanafa mago'e hu'ana alopa gefati ge hu'anae'mo, Ala kava nene, Nevini aginagomo kahau huka la'ato, hu'ana ge hu'na'ae. 32 Yesu'a ani gemo afigeno anataleno o'u'nifa uno he tino mai'neno'ae'mo, na kava hu'na lanatesuvafe'mo neha'ae, huno anafi ge'nige'anae'mo, 33 Ala kava nene, la'aulagati'amo alika ayakeka la'ato, hu'ana ha pai'na'ageno'ae'mo 34 Yesu'a hau huno anateteno anaulagalate'mo aya'mo male'neno alino ayakeno anate'nige'ana age'ana yakete'ana akame hu'ana u'na'ae.